।। श्रीहनुमते नमः ।।
जय बजरंगबली गिरिधारी ।
विग्रह बानराकार पुरारी ।।१ जय. ।।
राम काज कारन बपु धारी ।
मंगल मूल अमंगल हारी ।।२ जय. ।।
लहत मोद प्रभु वदन निहारी ।
रामभक्त सेवक हितकारी ।।३ जय. ।।
निज सेवा बस किहेउ खरारी ।
सुखसागर श्रीराम सुखारी ।।४ जय. ।।
साधु संत सुर नर मुनि नारी ।
गावत गुन कहि महिमा भारी ।।५. जय. ।।
बाल समय मुख धरेउ तमारी ।
छाई लोक सकल अँधियारी ।।६. जय।।
विनय सुनत लखि लोक दुखारी ।
छाड़ेउ रवि फैली उजियारी ।।७ जय. ।।
सीता खोजि भालु कपि हारी ।
बोले बस अब आस तुम्हारी ।।८ जय. ।।
सीता सुधि लायेउ पुर जारी ।
राम कहेउ सुत बड़ उपकारी ।।९ जय. ।।
लखन गिरेउ जब समर मझारी ।
दिहेउ सजीवन द्रोण उपारी ।।१० जय. ।।
नाग फाँस बस देखि अघारी ।
महावीर लायेउ उरगारी ।।११ जय. ।।
सेन सहित अहिरावण मारी ।
अनुज सहित लायेउ दनुजारी ।।१२ जय. ।।
गिरि गोवर्धन उपकृत भारी ।
वृजमण्डल महुँ थपेउ विचारी ।।१३ जय. ।।
पारथ रथ ध्वज कहे मुरारी ।
बसे विजय भारत अधिकारी ।।१४ जय. ।।
साधु संत सब कहत पुकारी ।
राखे कोटि गरीब सुधारी ।।१५ जय. ।।
राम तात सीता महतारी ।
अब जनि राखो मोहि बिसारी ।।१६ जय. ।।
कृपा कोरि मोहि बेगि निहारी ।
रामदूत अब लेउ उबारी ।।१७ जय. ।।
दीन संतोष करवरें टारी ।
होउ सहाय दीन दुख हारी ।।१८ जय. ।।
।। जय बजरंगबली गिरिधारी की ।।
